मुंबई |
राष्ट्रवादी काँग्रेसमधून उपमुख्यमंत्री अजित पवार यांच्यासोबत आलेल्या आमदारांच्या मतदारसंघात विकास कामांसाठी प्रत्येकी शंभर कोटी रुपये देण्याचे ठरले आहे. याच अधिवेशानात हा निर्णय होणार असून त्यासाठी ताताडीने प्रस्ताव तयार करण्यास सांगण्यात आले आहेत. राजकीय परिस्थिती पाहता मंत्रिमंडळ विस्तार आता अशक्य वाटत असल्याने सोबत आलेल्या आमदारांना ही भेट देण्याचे पवार यांचे नियोजन आहे. त्यानुसार आता संबंधित आमदार कामाला लागले असून आपल्या मतदारसंघात त्यासंबंधीचे नियोजन सुरू केले आहे.
शिवसेना फुटली तेव्हा खोक्यांची चर्चा झाली होती. राष्ट्रवादीत फूट पडल्यावर अशी चर्चा झाली नाही. मात्र, सोबत आलेल्या आमदारांना मंत्रिपद किंवा निधी अशी काही तरी भेट मिळणार, अशी चर्चा सुरू होती. राष्ट्रवादीतील अनेक आमदार मंत्रिपदाची आस ठेवून अजित पवार यांच्यासोबत गेले होते. पहिल्या टप्प्यात प्रमुख नेत्यांचा शपथविधी झाला. विस्तारात इतरांपैकी काहींना स्थान मिळेल, अशी अपेक्षा होती. मात्र, राजकीय गुंता वाढत गेला. आधीच प्रतिक्षेत असलेल्या शिवसेना शिंदे गट आणि भाजपच्या आमदारांना अद्याप मंत्रिपद मिळाले नाही. आता उरलेल्या १४ मंत्र्यांमध्ये वाटेकरी वाढल्याने अनेकांना संधी मिळणे कठीण आहे. त्यामुळे मंत्रिमंडळ विस्तारानंतरही नाराजी कमी होण्यापेक्षा वाढण्याचीच शक्यता अधिक आहे.
आमदारांना १०० कोटी देण्याचे नियोजन सुरू, अधिवेशात विषय मार्गी लागणार
हे लक्षात घेऊन वेगळी योजना आखण्यात आली आहे. अजित पवार यांच्यासोबत गेलेल्या आमदारांना मतदारसंघातील विकास कामांसाठी प्रत्येकी १०० कोटी रुपये देण्याचे नियोजन आहे. येत्या पावसाळी अधिवेशनातच हा विषय होणार आहे. त्यासाठी आवश्यक ती पूर्तता करण्याच्या सूचना अजित पवार यांनी दिल्या आहेत. त्यानुसार संबंधित आमदार कामाला लागले आहेत. आपल्या मतदारसंघात विश्वासू कार्यकर्त्यांच्या बैठका घेऊन कोणती कामे करायची, याचे नियोजन सुरू आहे. यासंबंधीचे प्रस्ताव तयार करून ते सादर केले जाणार आहेत. त्यानंतर सरकारी पातळीवर त्यावर काम होईल. अधिवेशनापूर्वी ही सर्व प्रक्रिया पूर्ण करण्याच्या सूचना देण्यात आल्या आहेत. मात्र, असा निधी केवळ अजित पवार यांच्यासोबत गेलेल्या आमदारांना दिला जाणार की सत्ताधारी पक्षाच्या सर्वांना दिला जाणार, हे अद्याप स्पष्ट झाले नाही. भविष्यात यावरूनही नाराजी ओढावण्याची शक्यता नाकारता येत नाही. एकूणच आता सत्ताधाऱ्यांकडून आगामी निवडणुकीची तयारी सुरू झाल्याचे संकेत मिळत आहेत.
शिंदे अस्वस्थ, दादा सुस्साट
एका बाजूला शिंदे गटाच्या आमदारांवर अपात्रतेती टांगती तलावर असताना नव्याने सरकारमध्ये सामील झालेल्या अजित पवार गटाने कामांच्या बाबतीत सक्रीयता दाखविण्यास सुरवात केली आहे. त्यांच्यासोबत आलेल्या मंत्र्यांचे खाते वाटप झालेले नाही. स्वत: अजित पवार यांच्याकडेही कोणते खाते असेल, हे स्पष्ट झालेले नाही. तरीही पवार यांनी कामाला सुरवात केल्याचे दिसते.
.
