जळगाव |
राज्याचे पाणीपुरवठा मंत्री गुलाबराव पाटील यांनी एकनाथ खडसे महसूलमंत्री असताना त्यांच्यावर भ्रष्टाचाराचे जाहीर आरोप केले होते. याप्रकरणी खडसे यांनी गुलाबराव पाटलांविरुद्ध ५ कोटींचा अब्रुनुकसानीचा दावा दाखल केला होता. याच दाव्याच्या प्रकरणात आज न्यायालयात कामकाज झाले. मात्र गैरहजर राहिल्याने कोर्टाने गुलाबराव पाटील यांना ५०० रुपयांचा दंड ठोठावला आहे.
गैरहजर राहण्यास परवानगी
या प्रकरणातील सुनावणीला गैरहजर राहण्याची परवानगी मिळावी, म्हणून गुलाबराव पाटील यांनी अर्ज दाखल केला होता. न्यायालयाने हा अर्ज मंजूर केला मात्र, खर्च म्हणून ५०० रुपयांचा दंड ही न्यायालयाने केला. तसेच उद्याचा सुनावणीचा दिवस सोडून पुढची तारीख मिळणार नाही, अशी तंबीही कोर्टाने दिली. या खटल्याची पुढील सुनावणी आता २१ जून रोजी होणार आहे. गुलाबराव पाटील यांचे वकिल शैलेंद्र पाटील यांनी न्यायालयात बाजू मांडली. तर माजी मंत्री एकनाथ खडसे यांच्याकडून ॲड.प्रकाश पाटील यांनी बाजू मांडली.